Wafti Sare oo ka socda Guddiga Difaaca ee Baarlamaanka Mareykanka, dublamaasiyiin iyo saraakiil sare oo socday Wasaaradda Dagaalka ee Mareykanka oo arbacadii tagay Kismaayo ayaa kulan aan caadi ahayn la yeeshay Madaxweynaha Jubbaland Axmed Maxamed Islaam (Madoobe) iyo xubno haysta kalsoonidiisa kana tirsan maamulka iyo Xildhibaano Federaal oo kasoo jeeda Jubbaland.
Idilnews ayaa ogaatay in kulanka diirada lagu saaray xaalada Amni iyo tan siyaasadeed ee Soomaaliya. Xubnaha Mareykanka ah ayaa aad uga hadlay dadaallada Washington galisay Dowlad dhiska Soomaaliya iyo la-dagaallanka argagaxisada, waxaana ay ku eedeeyeen hoggaamiyayaasha Koonfurta Soomaaliya in aysan diyaar u ahayn ka adkaanshaha Al-Shabaab iyo in horey loo dhaqaajiyo nidaamka dowladdeed ee dalka.
Xubnaha ayaa xusay in Mareykanku hadda aaday jiho cusub oo ku wajahayo Arrimaha Soomaaliya, kagana guurayo qorshahoodii hore ee ay ku bixiyeen Balaayiinta dollar, lana joojiyay taageerada dhaqaale ee Ciidanka Nabad ilaalinta Soomaaliya ee ka socda Midowga Africa, iyo in si gaar ah loola macaamilo Dowladda Federaalka ee fadhigeedu yahay Muqdisho.
“Ma doonayno in joogitaan uu Mareykanku ku yeesho Koonfurta Soomaaliya, marka laga reebo deegaanada Jubbaland, waxaan rabnaa in la helo Ciidan Jubbaland leedahay oo la yaqaan tiradooda, annaguna waan taageeri doonaa, si Al-Shabaab looga xoreeyo goobaha muhiimka ah ee ay joogto ee Jilib ilaa Jamaame muddo kooban gudaheed” ayuu yiri sarkaal katirsan Pentagon-ka Mareykanka oo waftiga qeyb ka ahaa, sida uu inoo sheegay mid kamid ah ka qeybgalayaashii kulanka ee Jubbaland.
Xubnaha Mareykanka ayaa sidoo kale la wadaagay Madaxweyne Axmed Madoobe in ay doonayaan in ay ka helaan saldhig Militari degmada Afmadow. Saldhiga ayaa qeyb ka noqon doona goobaha lagu diyaariyo howlgallada Mareykanka ee Koonfurta Soomaaliya.
Mareykanka ayaa hadda dardargeliyay qorshihiisa ka guurista Koonfurta Soomaaliya, waxaana saldhigyo militari uu ka dhistay Puntland iyo Somaliland, isagoo qorsheynaya in uu ka hago weerarrada ka dhanka ah argagaxisada, si loo dhimo khatartooda.
IDILNEWS