Nin hubaysan ayaa xalay ku toogtay degmada Jariiban ee gobolka Mudug, Taliyihii Booliska Jariiban G/lle Guuleed Kadleeye.
Alle ha u naxariistee marxuum Guuleed Kadleeye ayaa dhowaanahan hoggaaminayay howlgallo culus oo ka dhan ah kooxo Burcad-badeed ah iyo maleeshiyaad kale oo hubeysan oo falal amni darro ka geysanayay degmada Jariiban.
War kasoo baxay Taliska Qeybta Booliska gobolka Mudug ayaa lagu xaqiijiyay geerida Taliye Guuleed. Taliska ayaa sheegay in ay gacanta kusoo dhigeen Ibraahim Axmed Kooshin oo ku eedeeysan dilka Taliyaha.
“Taliska Qaybta Booliska Gobolka Mudug ayaa xaqiijiyay in gacanta lagu dhigay eedeysanaha lagu magacaabo Ibraahim Axmed Kooshin, kaas oo lagu eedeeyay inuu geystay dilkii Taliyihii Saldhigga Degmada Jariiban, Alle ha u naxariistee G/le Guuleed Kadleeye.”
Booliska gobolka Mudug ayaa sheegay in howlgal ay sameeyeen ciidamadu lagu soo qabtay eedeeysanaha loo haysto dilka G/lle Guuleed.
“Taliska ayaa sheegay in howlgal degdeg ah oo ay ciidamada boolisku fuliyeen lagu soo qabtay eedeysanaha, isla markaana la horgeyn doono hay’adaha garsoorka si sharciga loo marsiiyo.”
“Ugu dambeyn, Taliska Qaybta Booliska Gobolka Mudug ayaa mar kale tacsi u diray ehelkii, qaraabadii iyo dhammaan shacabka Soomaaliyeed ee uu ka baxay marxuumka, iyagoo Alle uga baryay inuu Janatul Firdowsa ka waraabiyo Marxuum G/le Guuleed Kadleeye, samir iyo iimaanna ka siiyo qoyskiisa iyo shacabka Puntland.”
IDILNEWS