Maleeshiyaad iyo gaadiid dagaal oo ay leeyihiin ilmo Diyaano, kana tirsan Ciidankii horey loo oran jiray PSF ayaa isku dhiibay Ciidamada Difaaca Puntland, kaddib saacado badan oo ay go’doon ku ahaayeen Togga Madar Jiifle ee deegaanka Laag.
Idilnews ayaa xaqiijisay in maleeshiyaadka is dhiibay ay wataan 8 gaari oo Tikniko ah iyo gaari Ambulance ah. Waxaana jira Rag hubaysan oo kamid ahaa, kuwaas oo habeenimadii xalay lug uga baxay Togga.
Ciidanka Puntland oo aroornimadii gudaha u galay Togga Madar Jiifle ayaa hadda si rasmi ah ula wareegay gaadiidka iyo maleeshiyaadka watay, taas oo ka dhigan in howlgalka lasoo afmeeray.
Maleeshiyaadka ayaa mar qura galabnimadii shalay isku dayay in ay kasoo baxaan dhuuxa Togga Madar Jiifle, balse ciidamada Puntland ayaa weerar ku ekeeyay, waxaana soo gaaray khasaare isugu jira Hal dhimasho ah iyo dhowr dhaawac ah.
Puntland ayaa dhowaan mamnuucday in maleeshiyaadka hubaysan ee aan ahayn ciidamada Dowladdu ku safri karin gudaha mandiqada, aysana kasoo bixi karin xerooyinkooda, tan ayaa sababtay in xubnaha haysta maleeshiyaad beeleedyadu aysan kasoo bixin guryahooda iyo xeryaha ciidamadooda, baqdin ay ka qabaan in la weeraro.
IDILNEWS