Sida ay ogaatay Idilnews – Cabdiraxmaan Maxamed Xassan (Gablax) oo ah Xildhibaan katirsan Baarlamaanka Puntland ayaa maalmo kahor diidmo adag kala kulmay laamaha ammaanka Puntland, kaddib markii uu isku dayay in ilaalo wadata gaadiid qoryo saaran yihiin uu kaga amba-baxo Garoowe.
Gablax oo kamid ah shaqsiyaadka reer Puntland ee qeybta ka ah qorshaha maamulka Xassan Shiikh ee khalkhalgelinta ammaanka Puntland, ayaa todobaad kahor soo gaaray Garoowe, waxaana uu maalmo rabay in uu u sii gudbo Gaalkacyo, isagoo ay galbinayaan labo gaari oo Tikniko ah, oo ay saaran yihiin qoryaha waa weyn ee dhashiikaha.
Hay’addaha ammaanka oo ka war helay safarkiisa ayaa la socod siiyay inuu gaadiidka Tiknikada ah uu ka dajiyo qoryaha, ayna wiilasha la socda fuulaan iyagoo qoryo la,aan ah si uu u safro, maadama loo tixgelinayo xasaanada Xildhibaanimo ee uu wato.
Gablax ayaa aqbalay amarka laamaha ammaanka, waxaana uu ka amba-baxay Garoowe, kuna safray gudaha deegaanada Puntland, isagoo raacay habraacyadii ay u soo jeediyeen laamaha amnigu. Xogaha ayaa intaa ku daraya in Gablax lagu wargeliyay in aan mar dambe laga aqbali doonin ilaalo wadato gaadiid Tikniko ah.
Dhinaca kale, Hay’addaha Ammaanka Puntland ayaa ku howlan diyaarinta iyo isku daba ridka dambiyo la xiriira abuurista kooxo burcad-badeed ah oo lagu eedeeynayo Gablax in uu ka sameeyay deegaanka uu kasoo jeedo Garacad, iyadoo Idilnews ogaatay suuragalnimada in Xeer ilaalintu kusoo oogto Xildhibaanka dacwad, una gudbiso Baarlamaanka in xasaanada laga xayuubiyo.
IDILNEWS