Somaliland ayaa si weyn u soo dhaweeysay go’aanka Gabadha lagu magacaabo Fahiimo Yuusuf Quuje ugu soo laabatay Somaliland, kagana tanaasushay maamulka Sool Bari ee laga yabyabay Laascaanood.
Wasiirka Biyaha Somaliland, ayaa sheegay in si weyn ay u soo dhaweynayaan Fahiimo Quuje, waxaana uu intaa ku daray in ay soo daba socdaan inta hartay bulshada Sool Bari ee ku sugan Laascaanood.
“Fahiima Quuje iyadaa go’aansatay inay Qarankeedii ku soo noqoto, inta hadhay reer Laascanoodna way soo socdaan” ayuu yiri Wasiirka Biyaha Somaliland.
Fahiima Quuje ayaa hormuud u ahayd kacdoonkii Somaliland ka dhanka ahaa ee December 2022, ka bilowday Laascaanood, kaas oo ugu dambeyn sababay in Somaliland laga saaro Laascaanood iyo Sool Bari 25 August, 2023.
Laascaanood ayaa hadda noqotay magaalo wajahaysa xaalado adag iyo duruufo maamul iyo mid dhaqaale, waxaana jira cabsi laga qabo in dagaal sokeeye ka qarxo, xilli weli xal loo la’yahay xasuuqii Ari-Caddeeye ee loo geystay Beesha Fiqishini, kaddib weerar ay ku qaadeen maleeshiyaad katirsan maamulka Firdhiye ee Sool Bari.
IDILNEWS