Idilnews ayaa xaqiijisay in uu fashilmay, is afgarad la doonayay in ay Dubai ku gaaraan Madaxweynaha Puntland, Siciid Cabdulaahi Deni iyo Madaxweynaha Jubbaland Axmed Maxamed Islaam.
Heshiiska Deni iyo Madoobe, oo ay daba ka riixayeen xubno ka agdhow labadooda iyo saraakiil u dhashay Imaaraatka Carabta ayaa guuldareystay saacadihii u dambeeyay ee uu qabsoomi lahaa kulan ballaaran oo dhex mara labada Madaxweyne.
Wararka ayaa sheegaya in Siciid Deni uu dib uga gurtay heshiis uu hadda la galo Axmed Madoobe oo dareemaya go’doon siyaasadeed, isagoo ku adkeystay in uusan muhiim u arag, maadama axdi kasta oo siyaasadeed oo lala gaaro ka fuleyn dhankiisa.
Madoobe ayaa xalay soo gaaray Nairobi, oo habeeno kahor uu yimid Siciid Deni, mana jirto rajo laga qabo is arag dhexmara iyo isu soo dhawaansho la xiriira arrimaha la isku hayo, wallow ay jiraan dadaallo ay wadaan xubno isugu jira ganacsato iyo siyaasiyiin oo doonaya in la dhameeyo khilaafka saddex sano jirsaday.
Maalmaha soo socda Deni iyo Madoobe ayaa qorshuhu yahay in ay kala gaaraan deegaanadooda, taas oo culeyska siyaasadeed ku kordhin doonta Axmed Madoobe, niyad jabna u ah siyaasiyiinta mucaaradka ah ee ku sugan Muqdisho, kuwaas oo u arka is qaadashada labada nin fursad siyaasadeed iyo in ay heli doonaan geed fadhi la loodiya Xassan Shiikh.
IDILNEWS