Dowladda Puntland ayaa sheegtay in howlgal qaatay saacado kooban, kana dhacay deegaanka Laag ee gobolka Bari ay kusoo qabteen maleeshiyaad hubaysan oo khal-khal gelin amni ka abuurayay deegaanada Puntland.
War kasoo baxay Taliska Howlgalka Ciribtirka Argagaxisada Puntland ayaa lagu sheegay in maleeshiyaadka hubaysan ay u shaqeynayeen Madaxweynaha waqtigiisu dhammaaday ee DFS Xassan Shiikh, si ay waxyeeleeyaan Amniga iyo xasiloonida Puntland. Waxaana intaa uu ku daray in la dabajoogo firxadkooda, lana soo afjari doono saacadaha soo socda.
“Ciidamada Difaaca Puntland oo deegaanka Laag kusoo afjaray hawlgal qaatay saacado kooban malayshiyaad khal-khal amni ka abuuray Puntland, muddooyinkii u dambeeyey, kuwaas oo Madaxweynaha Wakhtigiisu dhammaaday ee Dowladda Federaalka Soomaaliya sal u yahay abaabulkooda.”
“Xukuumadda wakhtigeedu dhammaaday ee sharcidarada wadanka ku joogta ayaa malayshiyaadkan u abaabushey, si ay u waxyeeleeyaan amniga, xasiloonida, wadajirka, dowladnimada iyo nabadda Puntland. Malayshiyaadkan ayaa ciidamadu ka qabteen gawaari ciidan, hubka noocyadiisa kala duwan iyo maxaabiis, halka lagu raadjoogo firxadkooda oo kala firdhaday, saacado koobanna lagu soo afjaridoono.”