Madaxweynaha dalka Maraykanka Donald Trump ayaa habeenimadii xalay laga saaray goob ay casho sharaf ku lahaayeen isaga iyo Warbaahintu, kadib markii rasaas tiro badan laga ridey banaanka Hoteelka Washigton Hilton oo ahayd meesha casho sharaftu ka dhacaysay.
Muuqaalo laga duubtay goobtaasi ayaa muujinaya dhawaaq iyo sawaxan ka bilaabmay hoolka iyo banaankiisa, iyada oo ciidamada amaanku garbaha qabanayaan Trump isla markaana goobta ka saarayaan.
Dhacdada kadib, Donald Trump ayaa sheegay iney nabad qabaan isaga iyo Marwada koobaad iyo madaxweyne ku-xigeenka dalkaasi, isagoo u mahad celiyay booliska iyo ciidamada amaanka.
Hay’adda Secret Service ayaa sheegtay in rasaastu ka dhacday meel lagu hubinayay amniga, isla markaana hal qof la xidhay, iyadoo weli la baadhayo xaaladda dadka ku lug lahaa falkani.
Trump ayaa sheegay in laga yaabo inuu isagu ahaa bartilmaameedka weerarka rasaasta, isagoo yiri “waan u maleynayaa” markii su’aal laga weydiiyay weriyeyaasha. Wuxuu sidoo kale sheegay in ninkii weerarka geystay uu u muuqdo qof kaligiis falka sameeyay, wuxuuna meesha ka saaray wax xiriir ah oo la leh dagaalka Iran.