War-saxafadeed kasoo baxay Taliska Qeybta Booliska gobolka Nugaal ayaa lagu beeniyay wararka been abuurka ah ee lagu faafiyay baraha bulshada ee la xiriira Ammaanka caasimadda Puntland ee Garoowe.
Taliska Booliska Nugaal ayaa xusay in Garoowe uu ka jiro Amni buuxa iyo xasilooni.
Hoos ka akhriso War-saxafadeedka kasoo baxay Taliska Qeybta Booliska Nugaal.
Warsaxaafadeed
Ku-simaha Taliyaha Qaybta Booliska Gobolka Nugaal ahna Taliye Ku-xigeenka Qaybta, G/dhexe Ayax Jamal Axmed, ayaa bulshada ku nool caasimadda Garoowe iyo guud ahaan Gobolka Nugaal u caddeeyay in aysan jirin wax xasilooni darro ah oo ka soo cusboonaatay degmada Garoowe, isla markaana amniga iyo xasiloonida gobolku ay yihiin sidii caadiga ahayd.
Taliyuhu wuxuu sidoo kale sheegay in wararka lagu faafinayo baraha bulshada ee ku saabsan xaaladda amniga ay yihiin kuwo ka fog xaqiiqada, islamarkaana ay faafinayaan shaqsiyaad doonaya inay khal-khal geliyaan xasiloonida bulshada.
Ugu dambayn, Taliska Booliska Gobolka Nugaal wuxuu shacabka u xaqiijinayaa in amniga gobolku ku jiro gacanta hay’adaha dowladda. Waxaana socda baaritaan ku aaddan cid kasta oo lagu tuhmo inay ku lug leedahay faafinta wararka marin habaabinta ah ama falal amniga lagu khalkhal gelinayo. Qof kasta oo lagu helo arrimahaasi waxaa laga qaadi doonaa tallaabo sharci ah, waxaana la horgeyn doonaa maxkamadda awoodda u leh.
IDILNEWS