Ciidamo wata gaari ayaa kasoo goostay xerada ilma Diyaano ee magaalada Boosaaso, kaddib khilaaf maalmaha ka jira gudaha xerada oo horay saldhig ugu ahayd Ciidamada horey loo oran jiray PSF, iyagoo isku soo dhiibay Ciidanka Amniga Dowladda Puntland.
Idilnews ayaa ogaatay in Ciidanka oo shalay kasoo goostay xerada ilma Diyaano ay dhan yihiin ilaa 20 Askari, kuwaas oo uu hoggaaminayo Sarkaal lagu magacaabo Kornayl Shariif Cali Gamgam. Waxaana ay wataan gaari Takniko ah iyo hubkooda.
Sarkaal iyo Ciidanka soo goostay ayaa la geeyay goob loo diyaariyay oo Ciidan, waxaana jira xiriiro ay soo saameynayaan Askar kale oo katirsan Ciidanka horey loo oran jiray PSF, ee ku jira Xerada ilma Diyaano ee Boosaaso, kuwaas oo doonaya in ay isku soo dhiibaan dowladda Puntland.
Ciidanka Puntland ayaa hareereeyay xerada ilma Diyaano ee Boosaaso, taas oo keentay khilaaf soo kala dhexgalay Qoyska iyo dhallinyarada kale ee Reer Puntland ee Askarta ahaa, kuwaas oo ku dooddaya in aysan ku dhimanayn Difaaca Qoys iyo danta wiilal walaalo ah oo fulinaya danaha cadowga Puntland, iyagoo dalbaday in ay isku dhiibaan Ciidanka Dowladda.
Ilma Diyaano ayaa u diidday dhallinyarada Ciidanka PSF horay loo oran jiray katirsanaa, waxayna taas keentay in qaarkood awood uga soo baxaan xerada, halka kuwa kalena kasoo daateen darbiyada.
IDILNEWS