Garaad Jaamac Garaad Cali ayaa baaq nabaddeed kasoo saaray dagaal beeleed dib uga bilowday deegaanka Caado ee degmada Wardheer ee gobolka Doollo.
Shir jaraa’id oo uu qabtay Garaad Jaamac ayuu ku sheegay in beelaha walaalaha ah ee dagaallamaya (Ismaaciil Gumcadle iyo Ibraahim, Ogaadeen) looga baahan in ay joojiyaan dagaalka, laguna noqdo gogasha nabadda.
“Waxaa lay sheegay in tolkii xaajadoda la dhameeyay ay laba furantay. Waxaan maqlay in dhimashadu lix qof marayso. Marka hore waan ka tacsiyeynaynaa. Waxaan leeyahay xigtooy qaraabo dhaw ayaad tihiin ma kala maarantahay. Intuu walaalka kuu nool yahay ayuu col kaa difaaci karaa, ceel kaa waraabin karaa, oo ceesh kaa soori karaa, hadaad iska disho adaa garabkaagi banneeyay”.
Dagaalka ayaa sababay dhimashada 6 qof oo dhinacyada dagaallamay. Garaad Jaamac ayaa ugu baaqay maamulka DDS in degdeg loo kala dhexgalo beelaha dagaallamaya, laguna qabto gacan bir ah.
“Laba qof xadhiga haday isku qabsadaan ka sii daaya ayaa taagnada, ka loo sii daaya dhaca. Ragganimadu waxay ku jirtaa Samirka. Dowladda waxana leeyahay meesha in Dowladi ka jirto ha muuqato. Gacan bir ah ku qabta. Ka maanta la xidho beribuu darreemi doona in tolnimo loo qabtay” ayuu yiri Garaad Jaamac Garaad Cali.
IDILNEWS