Mas’uuliyiin ka tirsan Golaha Wasiirrada iyo Xildhibaannada Dowladda Puntland oo howlaha shaqo u jooga Gobolka Mudug ayaa maanta kulan la yeeshay Guddiga Amniga Gobolka Mudug, oo uu hoggaaminayay Guddoomiyaha Gobolka Mudug.
Kulanka ayaa looga hadlay xaaladda amniga Gobolka Mudug, xoojinta wada-shaqeynta hay’adaha dowladda iyo dardargelinta dadaallada lagu xaqiijinayo nabadgelyada iyo xasilloonida gobolka.
Mas’uuliyiinta ayaa sidoo kale iska xog-waraystay xaaladda guud ee Gobolka Mudug, gaar ahaan arrimaha amniga iyo nabadda, iyagoo adkeeyay muhiimadda ay leedahay in si wadajir ah looga shaqeeyo sugidda amniga, xoojinta nabadgelyada iyo ilaalinta danaha bulshada.
Kulanka ayaa kusoo dhammaaday is-afgarad ku aaddan in la sii xoojiyo wada-shaqeynta hay’adaha dowladda iyo dadaallada lagu xaqiijinayo amni iyo xasillooni waarta oo Gobolka Mudug ah.
IDILNEWS
