Madaxweynaha Puntland, Siciid Cabdulaahi Deni ayaa ku dhawaaqay in dhowaan la bilaabi doono waddo laami ah oo xiriirisa degmooyinka dhaca Barriga Puntland, ee gaaristoodu fog tahay.
Isagoo xalay la hadlayay bulshada degmada Baargaal ee gobolka Raas-caseyr, ayuu Madaxweyne Deni sheegay in lasoo dhameeyay daraasad lagu sameeyay dhismaha waddo laami ah oo ka leexan doonta deegaanka Kala-beyr ee Boosaaso aadina doonta degmooyinka Isku-shuban iyo Ufeyn.
Madaxweyne Deni ayaa sheegay in marka lasoo gabagabeeyay dhismaha Waddada lasii amba qaadi doono, ilaa laga gaarsiiyo magaalada Caluula ee caasimadda gobolka Raas-caseyr, oo dhacda cirifka Bari ee Puntland, ahna aaga muhiimka ah ee gobolka Geeska Afrika.
Waxaa uu xusay in Dowladda Puntland ay hadda gaarsiisay waddo laami ah degmooyinka Galbeedka Puntland ee gobolka Sanaag, iyadoo hadda Waddadu maraysa degmada Badhan, isagoo intaa ku daray ay dowladdu baadi goobayso Mashruuc weyn oo lagu dhiso waddooyinka degmooyinka Barriga Puntland, maadama ay yihiin dhul adag, oo u baahan buundooyin badan.
IDILNEWS