Madaxweynaha Puntland, Siciid Cabdulaahi Deni ayaa galabta u amba-baxay dalka Itoobiya. Diyaarad gaar ah ayaa ka qaaday Madaxweynaha garoonka diyaaradaha caasimadda Puntland ee Garoowe.
Madaxweyne Deni ayaa habeenimadii xalay ilaa maanta ku wargeliyay qaar kamid ah xubnaha dowladdiisa ee ku dhow safarkiisa Itoobiya, kuwaas oo dhankooda laga helin faahfaahin rasmi ah, marka laga soo tago in uu u sheegay in uu yahay safar degdeg ah oo qaadan kara maalmo.
๐ ๐ฎ๐ ๐ฎ๐ฎ ๐ธ๐ฎ ๐ผ๐ด๐ฎ๐ฎ๐ป๐ฎ๐ ๐๐ผ๐ฐ๐ฑ๐ฎ๐ฎ๐น๐ธ๐ฎ ๐๐ฒ๐ป๐ถ ๐ฒ๐ฒ ๐๐๐ผ๐ผ๐ฏ๐ถ๐๐ฎ ?
Ma aheyn safarka Madaxweyne Siciid Deni ee Itoobiya, mid horey u qorsheysnaa, waxaana uu yimid xilli adag oo Puntland wajahayso duullaan ka dhan ah Amnigeena, kaas oo uu kusoo qaaday maamulka Muqdisho ee uu hoggaamiyo Madaxweynaha waqtigiisu dhammaaday, Xassan Shiikh Maxamuud.
Idilnews ayaa heshay in safarka Madaxweyne Deni uu ku yimid wada-hadallo socday dhowr maalmood, kaas oo u dhexeeyay xafiiska Madaxweynaha Puntland, Xafiiska Raโiisul Wasaaraha Itoobiya iyo Wasaaradda Arrimaha Dibedda Mareykanka.
Dhinacyada ayaa ka wada-hadlayay dagaalka ka dhanka ah argagixisada, iyadoo xubno sare oo dhanka sirdoonka Puntland laga soo xigtay in Mareykanka iyo Itoobiya ay ka digeen jiritaanka falal argagixiso oo kusoo wajahan Puntland. Addis Ababa ayaa doonaysa in la xaqiijiyo sugnaanshaha amni ee Puntland, maadama xuduudka Puntland iyo Itoobiya ay isku furan yihiin, uuna si weyn u saameyn karo xasiloonideeda gudaha.
Puntland ayaa dhowaan burburisay shabakaddo argagixiso oo ku wajahnaa Itoobiya, iyadoo magaalooyinka waa weyn ee Puntland laga qabtay ku dhowaad 60 dhallinyaro ah oo kasoo jeeda Dowlad Deegaanka Soomaalida, kuwaas la doonayay in loo qaado dalka Eritrea, si loogu soo tababaro, dibna loo galiyo Itoobiya, si qeyb uga noqdaan dagaalada ka dhanka ah Dowladda Itoobiya.
Dhallinyarada oo lagu qoray in laga dhigay Ciidan Soomaaliyeed, ayna diiwaangelinayaan xubno katirsan xafiiska Raโiisul Wasaare Xamze Cabdi Barre oo ka wakiil ah Dowladda Masar, ayaa galkooda lagu wareejiyay hayโaddaha amniga DDS. Wasiiru-dowlaha Madaxtooyada DDS ayaa xaqiijiyay qabashada dhallinyarada oo uu uga mahadceliyay Puntland. Waxaana uu sheegay in loo sameyn doono dhaqancelin, dibna loo gelin doono waxbarasho.
๐ ๐ฎ๐ฑ๐ฎ๐ ๐๐ฒ๐๐ป๐ฒ ๐๐ฒ๐ป๐ถ ๐ผ๐ผ ๐น๐ฎ ๐ธ๐๐น๐บ๐ฎ๐๐ฎ ๐๐ฏ๐ถ๐ ๐ถ๐๐ผ ๐ ๐๐ฏ๐ป๐ผ ๐๐ฎ๐ฟ๐ฒ ๐ผ๐ผ ๐ ๐ฎ๐ฟ๐ฒ๐๐ธ๐ฎ๐ป ๐ฎ๐ต.
Inta uu joogo Addis Ababa, Madaxweyne Deni ayaa kulan gaar ah la yeelan doono Raโiisul Wasaaraha Itoobiya Abiy Ahmed. Qodobada ugu weyn ee wada-hadalku waa marxalada amni iyo tan siyaasadeed ee Soomaaliya, sidii Puntland ugu diyaar-garoobi lahayd khatarta amni ee kusoo food leh iyo iskaashiga dhinacyada sirdoonka iyo milateriga.
Sidaas oo kale, Siciid Deni ayaa la kulmi doono dublamaasiyiin sare oo Mareykan ah.
Xogaha ayaa intaa ku daraya in Madaxweyne Deni uu saxiixi doono iskaashi cusub oo Amni oo dhexmari doona Puntland iyo Itoobiya. Addis Ababa ayaa hada Puntland ka taageerta dhinacyada sirdoonka iyo tababarada ciidamada, waxaana ku sugan gudaha Puntland ilaa 20 saraakiil amni ah oo tababarada ciidanka kala duwan ee Puntland.
Mareykanka iyo Itoobiya ayaa door weyn ku lahaa dagaalkii Puntland la gashay kooxda argagixisada ee Daacish, waxaana Taliska Ciidanka Mareykanka ee Africa (AFRICOM) uu si weyn ugu amaanay ciidanka Puntland ee PDF inay muujiyeen awood iyo adkeysi, si adagna u jabiyeen maleeshiyaadkii Daacish.
IDILNEWS